Sonasɩ
Sonasɩ 'a 'kwla 'kpa -tɩ
1
'Wɩ jrɛ' -nɩ 'e -wɛe Nyɔsoa wlu ka 'de Amatai 'a "ju Sonasɩ -pee ɛ 'na: 2 Sonasɩ, -ɩn -sɔn 'ʋn -wɛe "kwi -kwlɔ klaa" nyʋ a 'daa Ninifʋ ɛ, -ɩn -jeɛ 'di mu, -cɛ' ʋʋpʋ "bli dɛ-nʋɛ', ɛmɛ -nɩ 'di 'a wɔn nynia' -nɩa 'de ɛɛ' -kwlɔ tu 'di 'a -cruɛn" ji' ɛ je 'ʋn jɛɛ-.3 Sonasɩ 'kpa 'kwla ɔɔ muɛ 'de Taasisɩ 'de 'blʋa 'a 'fɔ jrɛ' "kpei, -bo ɔ nʋ kan', -mɛ ɔ 'wlʋ 'e Nyɔsoa "juɛi 'mɛ ɔɔ muɛ -ta -tɔɔn. -Kwlɔ nyʋ a 'daa Jafa -ɛ -nɩa 'de "ni -kwlɩ" mɛ ɔ mu 'di, -ta ɔɔ mua -mɛ ɔ jɛɛ -bato' -ɛɛ mua Taasisɩ ɛ, ɔ -sa ɔɔ' -je -kei" 'sʋ ɔ 'ja ɛ 'di 'de nyʋ "kwlu, -wɛe ɔ 'je 'de Nyɔsoa "juɛi 'wlʋ.
4 'Kaa Nyɔsoa -sa poɔ' klaa" "jɛi 'de 'tɔniɛ "kpei -wɛe -pie klaa" -te jia' -pʋn" 'de "ni "kpei. -Bato' ʋʋ nɩa 'diɛ ɛ 'na ɛ 'je wa-. 5 'Sʋ faʋn a nʋ -bato' 'a jeʋn 'mɛ -wɛe -jɔ -ble ɔɔ' kea ɔɔ baeɛ -wɛe ɛ 'je ʋʋpʋ o ji. 'Sʋ dɩ -nɩa -bato' 'di ʋʋa pʋɩ "niɔ- -wɛe -bato' 'je kwa "fee-. Sonasɩ -mɔ "siɛ i 'de -bato' 'a -kwlu' -wɛe ɔ 'pɛn i ɔɔ 'kpa "nyɩɔ. 6 'Bomɔ -bato' 'a tbaa i 'kpaa Sonasɩ -pʋn" -wɛe ɔ wlu ɔ -pee ɔ 'na: Dɛɛ -tɩ -mɔ -pɛn i 'nɔ -wɛe -ma -mʋ ɛ-? -Ɩn -sɔn 'ʋn -ɩn -je -ma kea -too" "i po "ko ɛ 'bɛɛ ɛ 'je -aa -tɩ' -kwlʋ o po ɛ-, -mɛ -a se 'mɛ i.
7 'Sʋ -bato' jeʋn 'na: Ao ji -a -je nʋe po -wɛe nyɔ -nʋɛ -wɛe 'kle -nɛ jia -a -ʋn "kpei ɛ -a -jeɔ juuo-. Ʋʋ poa nʋe 'sʋ ɛ, ɩ bluuɛ Sonasɩ "kpei. 8 'De ʋʋ 'na: Ɛ -mɔ -nʋɛ' -wɛe 'kle -nɛ jia "kpei, dɛ -ɩn jia 'boa 'nɔ -a "kwlu ɛ -ɩn -tmʋ -ɛ 'de -a -pee. -Ta ka -ɩn -wlʋ -ɛ? -Ma 'blʋa 'a 'nynɩ -wɛe? 'Cɛ -jʋ -ɩn -wlʋ 'e "kwlu -ɛ?
9 'Sʋ Sonasɩ 'na: 'Ɩn nɩɛ Eble i -o, 'ma plee ɛ Nyɔsoa Kea -nɩa 'de jaʋn 'di 'de -ɛ nʋa 'blʋa ke jaʋn, -ɛ nʋa 'tɔniɛ -wee' ɛ.
10 Ɔ 'na 'ma pleɛ Nyɔsoa "juɛi i. Ɔ 'da kan' 'sʋ faʋn 'kpa nyʋ -nʋ 'ʋn 'ɛ -wɛe ʋʋ wlu 'de ɔ -pee ʋʋ 'na: Dɛɛ-tɩ -ɩn nʋ -aʋn dɛ -nɛ "jrii -ɛ? 11 'Bomɔ nyʋ -nʋ 'wlʋʋ 'de Sonasɩ -pee, ʋʋ 'na kaan ka, ka -a -je -ma -tɩ' nʋ -wɛe 'tɔniɛ 'je ja ji 'de -a -pee -ɛ? Dɛ-nʋɛ' ɛmɛ -nɩ "ni nɩɛ wɔn -sansan ke.
12 'De Sonasɩ wluu 'de ʋʋ -pee ɔ 'na: Ao "duo 'ʋn -wɛe ao 'je 'ʋn "niɔ -fi" e 'de "ni 'je ja ji 'de ao -pee. Dɛ-nʋɛ' 'ɩn 'je kan' 'mɛ ɛ, 'mɔ -ɔ -nʋɛ -wɛe poɔ' klaa" -nɛ jii ao -pʋ 'ʋn -ta 'tɔniɛ "kpei.
13 Ɔ 'da kan' 'sʋ -bato' jeʋn 'na -mɛ -a po -bato' -wɛe -a -je 'kpʋʋ kpʋn, 'kaa ʋʋ nʋɛ' -nʋʋ -nʋʋ"- ɛ se 'bɛɛ-, dɛ-nʋɛ', 'tɔniɛ a nʋɛ wɔn kmaa', ɛ je -je "kpei -tie" cɛn 'de ʋʋ -pee, ɛɛ 'jaa -tikpe' -tikpe'. 14 -Ta ʋʋ 'jea ʋʋa' -cɛ" -tu" 'de sea nɩ sʋ ʋʋ -teɛ Nyɔsoa "jru i -fɩn" 'a -pʋn" ʋʋ 'na: 'Oo Nyɔsoa, -aa bae ɛ 'nɛ, ɛ 'de -aa ma" i -saa 'de "ju -nɔ 'ɔ -tɩ' 'ʋn, 'de nyɔ sea dɛjrɛ' nʋ 'a nmɔ 'de -aa "jru 'kpa a, dɛ-nʋɛ', dɛ -nʋ a ɛmɛ Nyɔsoa 'tʋn ɛ, ɛmɛ ɛɛ nʋ.